Беларус президенти Александр Лукашенко Россия президенти Владимир Путинга Украинанинг Россия томонидан босиб олинган ҳудудларини электр энергияси билан таъминлаш учун Беларусда яна бир атом электр станцияси (АЭС) қуришни таклиф қилди. Учрашув стенограммаси 26 сентябрь, жума куни Кремль сайтида чоп этилган.

Лукашенконинг сўзларига кўра, бу АЭС шарқий Беларусда қурилиши мумкин. У Украинанинг Россия ўзиники деб ҳисоблаган Херсон, Запорижжия, Луханск ва Донеск вилоятларига электр энергияси етказиб беришни ўз мақсадларидан бири деб атади.

“Росатом” атом энергетикаси соҳасини янада кенгайтириш имкониятларини аллақачон ишлаб чиққан. Мен бу ерда молиявий масалаларни омма олдида муҳокама қилишни истамайман. Бизда вариантлар бор, улар ҳақида айтиб бераман, агар қарор қабул қилинса, зарурат туғилса, дарҳол янги энергия блоки ёки янги станция қуришни бошлаймиз”, — деган Лукашенко.

Путин бу таклифни тўғридан-тўғри қўллаб-қувватламаган ва “Агар электр энергиясини олиб, керакли тарифни тўлайдиган истеъмолчи бўлса, бу умуман муаммо бўлмайди”, – деган Россия президенти.

• АЭС
• Беларусь
• Лукашенко
• Путин
• Россия