Ўзбекистонда тергов ҳибсхоналарида ушлаб турилган ва қамоққа олинган шахсларга байрам кунларида яқин қариндошлари ва бошқа шахслардан кийишга рухсат этилган кийим-бош ва пойабзал олиш ҳуқуқларини бериш, ҳар ойда озиқ-овқат ва энг зарур нарсаларни сотиб олиш учун рухсат этилган пул миқдорини оширишга оид нормаларни киритиш таклиф этиляпти. Бу ҳақда кеча, 18 ноябрь куни Олий Мажлис Қонунчилик палатасининг навбатдаги мажлисида кўриб чиқилган Олий Мажлиснинг Инсон ҳуқуқлари бўйича вакили (омбудсман)нинг “Жиноят ишини юритиш чоғида қамоқда сақлаш тўғрисида”ги Ўзбекистон Республикаси қонунига қўшимчалар киритиш тўғрисида”ги қонунчилик таклифида сўз боради. Ички ишлар вазирлиги Жазони ижро этиш департаменти бошқарма бошлиғи Баҳром Мадиёровнинг айтишича, ушбу қонун лойиҳасини ишлаб чиқишда омбудсман билан биргаликда халқаро тажриба ўрганилган.

“Ҳозирги амалиётда ҳам, агар уйдагилари уни кийим-бошини, пойабзалини, озиқ-овқати билан биргаликда олиб келадиган бўлса, қабул қиламиз. Унда муаммо йўқ. Бу норма фақат рағбатлантирувчи норма сифатида эътироф этиляпти. Кўпчиликда шундай ҳолатлар бўлади – уйдагилари хабар топади-да, унинг кийимини олиб келишга имконияти мавжуд бўлмай қолади. Кимдадир қандайдир шароит бўлиб қолади-да, “озиқ-овқатини кейин бераман, лекин ҳозир кийимини бериб туринг”, дейди. Шу мазмунда келса ҳам, биз бемалол уни олиб қўяверамиз. Ҳеч қандай муаммоси бўлмайди. Яъни, буни қонуний жиҳатдан ҳуқуқини таъминлаб қўйиш мақсадида бу норма киритиляпти”, – дейди Мадиёров.

Унинг айтишича, жуда кўп жазо ўтаётган, яъни тергов ҳибсхонасида сақланаётган шахслар уйдагилари томонидан берилган пул маблағларини етарли миқдорда эмаслиги бўйича мурожаат қилади. Ҳозирда тергов ҳибсхонасида сақланаётган шахслар ИИВ буйруғига мувофиқ ҳар ойда энг кам иш ҳақининг 50 фоизигача (635 минг 500 сўм) озиқ-овқат ва биринчи навбатдаги эҳтиёж молларига сарфлай олади. Лойиҳада бу миқдорни 1 миллион 271 минг сўмгача ошириш таклиф қилинмоқда.

“Фуқаролар узоқ жойлардан келиб, “посилка”, бандероль ёки йўқлов топшириб кетиш ҳолатлари жуда кўпайиб кетяпти. Битта мисол айтадиган бўлсак, марказий тергов ҳибсхонасида ҳозир 4000 дан ортиқ шахс сақланаётган бўлса, кунига 250-300 та фуқаромиз келиб, уларга “передача”, бандероль бериб кетяпти. Яъни фуқароларимизда ортиқча оворагарчилик пайдо бўляпти-да. Агар фуқаро уйдан чиқмаган ҳолда буни ўзининг ҳисоб рақамига пулини ўтказиб қўядиган бўлса, сақланаётган шахс шуни яратилган шароитларда ўзининг керакли, зарур бўлган маҳсулотларни харид қилиш имкониятига эга бўлади. Яъни уйдагиларининг оворагарчилигининг олди олинади”, – дейди ИИВ масъули.

Мажлисда қонунчилик таклифи депутатлар томонидан маъқулланган ва тегишли қарор қабул қилинган.

• ИИВ
• Jazo
• Қонун
• tergov