Математика фанидан асосий олимпиаданинг туман (шаҳар) босқичи саволлари республика бўйлаб ноқонуний тарзда тарқатилди. Бу маълумотни Ихтисослаштирилган таълим муассасалари агентлиги тасдиқлади.

14 октябрдан мактаб ўқувчилари учун асосий фан олимпиадасининг иккинчи - туман (шаҳар) босқичига старт берилганди. Олимпиаданинг мазкур босқичи 14-октябрдан 23 октябргача ўтказилиши белгиланган бўлиб, кеча, 14 октябрь куни математика фанидан 3 сменада олимпиада ўтказилган. Аммо Халқталиминфоънинг ёзишича, олимпиада иштирокчилари учун тузилган тест саволлари эрталаб соат 7:00 да ижтимоий тармоқларда тарқалиб кетган.

Айрим педагогларнинг айтишича, мазкур тест саволлари 14 октябрь куни эрталаб 800 минг сўмдан сотилган. Куннинг иккинчи ярмида эса тест саволлари нархи 200 минг сўмгача пастлаган.

Математика фанидан 10-синфлар учун тузилган тест саволлари анъанавий равишда олимпиада жараёни якунлангач, соат 15:58 да Ихтисослаштирилган таълим муассасалари агентлиги ҳузуридаги Фан олимпиадалари марказининг расмий Telegram саҳифасида эълон қилинган. Шундан сўнг педагоглар мазкур тестларни эрталаб ижтимоий тармоқларда тарқалган тестлар билан солиштириб кўриб, улар айнан бир хил тест саволлари эканлигининг гувоҳ бўлишган.

Ихтисослаштирилган таълим муассасалари агентлиги айни пайтда мазкур ҳолат юзасидан тегишли ўрганиш ишлари олиб борилаётганлигини маълум қилди.

“Ҳозирда бу ҳолатга сабабчи шахслар аниқланмоқда ва улар амалдаги қонунчилик доирасида жавобгарликка тортилади”, – дейилади агентлик хабарида.

Математика фанидан асосий олимпиаданинг туман (шаҳар) босқичи ҳар бир синф кесимида (9-10-11-синф) қайта ўтказилади.

Шунингдек, агентлик олимпиада саволлари ёки жавоблари пул эвазига таклиф қилинса, жараёнларга таниш-билишчилик ёки ноқонуний таъсир кўрсатиш ҳолатлари бўлса, бу ҳақда дарҳол Фан олимпиадалари марказининг махсус боти ёки +998 71 207 05 24 телефон рақами орқали хабар беришни сўраган.

• Олимпиада
• shahar