Беларус Тергов қўмитаси ўзининг Telegram каналида Минск осмонида уриб туширилган жанговар каллакли учувчисиз самолётнинг қулаши билан боғлиқ жиноят ишини тергов қилаётгани ҳақида хабар берди.

Дрон қолдиқларида украин тилидаги ёзувлар кўринади.

Дрон тунда навбатчи ҳаво ҳужумидан мудофаа кучлари томонидан аниқланган ва электрон уруш орқали бостирилган. У Минскдаги Матусевич кўчасидаги 72-уй ҳовлисида портламай қулаган. Дрон қолдиқлари тўхтаб турган бир нечта машинага зарар етказган ва қўшни ҳудудга келиб қўнган. Ҳеч ким жабрланмади, аҳоли эвакуация қилинмагани маълум қилинган.

Тергов қўмитаси ҳодиса сабабларини аниқламоқда ва тергов жараёни ҳақида жамоатчиликни хабардор қилади. Мудофаа вазирлиги ҳаво ҳудудидан фойдаланиш устидан назоратни кучайтириш бўйича қўшимча чора-тадбирлар кўраётганини таъкидлади.

“Республика Президенти Александр Лукашенко вазиятни шахсан назоратга олди”, — дейилади хабарда.

• Беларусь
• Минск
• дрон