“Мисрнинг Қоҳира шаҳрида вафот этган ватандошимизнинг жасади дипломатлар кўмагида Ўзбекистонга олиб келинди”, – деб хабар бермоқда “Дунё” агентлиги.

Элчихона маълумотларига кўра, Андижон вилоятида туғилган 68 ёшли фуқаро У.К. юрак хуружи оқибатида вафот этган. Ҳодиса ҳақида хабар олинган заҳоти элчихона ходимлари Мисрнинг масъул идоралари билан тезкор алоқа ўрнатиб, керакли ҳужжатларни қисқа фурсатда расмийлаштирган.

Дипломатлар марҳумнинг оила аъзоларини маънавий ва ташкилий қўллаб-қувватлашга алоҳида эътибор қаратиб, элчихона вакиллари авиакомпания ва ритуал хизмат кўрсатиш идоралари билан боғланган ҳолда, жасадни ўз вақтида ватанга қайтариш масаласини ҳал этган. Тегишли идораларнинг ҳамкорлиги натижасида марҳумнинг жасади Ўзбекистонга олиб келиниб, миллий қадриятларга мувофиқ дафн этилган.

Ўзбекистоннинг Қоҳирадаги дипломатик ваколатхонаси томонидан бундан аввал ҳам Мисрда вафот этган яна бир фуқаронинг жасадини репатриация қилишда зарур ёрдам кўрсатилганди.

• Elchixona
• Misr
• Ўзбекистонлик
• fuqaro