Навоий вилоятининг Қизилтепа туманида жазо муддатини ўтаётган диний олим чуқурлаштирилган тиббий муолажалар учун Тошкентдаги “Сангород” деб номланувчи жазони ижро этиш бошқармаси шифохонасига этап қилинган.

Бу ҳақда инсон ҳуқуқлари “Эзгулик” жамияти раҳбари Абдураҳмон Ташанов олимнинг яқинларига асосланган ҳолда хабар берди.

“Мубашшир Аҳмад (Алишер Турсунов)  Ўзбекистон Республикаси Ички ишлар ва Соғлиқни сақлаш вазирлиги томонидан жазо муддатини қамоқда ўтказишга монелик қилувчи касаллик — қандли диабетнинг оғир формаси билан оғриган.

Ўзбекистон Республикаси ИИВнинг жазони ижро этиш Департамент инсонпарварлик ва гуманизм тамойиллари асосида унинг жазо муддатини қамоқда ўтказиш билан боғлиқ чорани енгилроғи билан алмаштириш бўйича судга тақдимнома киритади, деган умиддамиз”, – деб ёзмоқда ҳуқуқ ҳимоячиси.

Маълумот учун, Мубашшир Аҳмаднинг адвокатлари бундан бир ой аввал ҳам мижозининг аҳволи кескин ёмонлашиб бораётгани сабабли ортиқ жазо муддатини ўтолмаслиги ҳақида баёнот билан чиққан эди. Аммо кейинроқ Олий мажлиснинг Инсон ҳуқуқлари бўйича вакили (омбудсман) Навоийдаги 5-сонли жазони ижро этиш колониясига ташриф қилиб, маҳкум Алишер Турсуновнинг тиббий ёрдам кўрсатилишидан шикояти йўқлигини қайд этган.

• Abdurahmon Tashanov
• хабар