Россиялик марҳум сиёсатчи Алексей Навалний штаблари собиқ раҳбари Леонид Волковга Вилнюсдаги уйи яқинида ҳужум уюштирилди.

“Ҳозиргина Леонид Волковга ўз уйи ёнида ҳужум қилишди. Машинанинг ойнасини синдириб, кўз ёшлантирувчи газ сепишган, кейин Леонидни болға билан ура бошлашган”, — деб ёзади Ярмиш.

Коррупсияга қарши кураш фонди директори Иван Жданов кейинроқ Волковнинг соғ-омонлигини маълум қилди.

Маълумотларга кўра, Волков дала ҳовлилардан иборат қишлоқда яшайди, шу сабабли ҳужум қилган шахс тасодифий кўча безориси ёки босқинчи бўлмагани, балки Волковга ҳужум қилиш учун атайлаб у ерга боргани тахмин қилинмоқда.

Ушбу ҳужумдан бир неча соатгина аввал Волков Медузаъга берган интервюсида Навалний жамоаси таҳдидларга учраётганини маълум қилган. “Ҳозир қаршимизда турган асосий хавф — ҳаммамизни ўлдириб юборишлари мумкинлиги. Ҳа, бу аниқ-равшан нарса-ку”, — деган эди у. Шунингдек, у Навалний жамоаси хавфсизлик протоколларини қайта кўриб чиқаётганини айтганди.

Волковга ҳужум 15—17 март кунлари бўлиб ўтадиган Россия президенти сайловлари арафасида юз берди. Алексей Навалний жамоаси “Путинга қарши чошгоҳ” акциясида қатнашишга чақирмоқда, у президент сайловида Владимир Путинга қарши овоз бермоқчи бўлганлар сайлов участкаларига бир вақтда — 17-март куни 12:00 да келишини кўзда тутади.

• Алексей Навалний
• Россия