Нью-Йорк тарихида сайланган илк мусулмон мер Зоҳран Мамдани лавозимига киришиш олдидан Қуръон билан қасамёд қилади. Бу ҳақда Associated Press хабар берди.

Мамданидан олдинги мерларнинг аксарияти Инжил билан қасамёд қилган. АҚШ федерал қонунлари, штат ва шаҳар конституцияларига содиқлик қасамёди учун диний китобдан фойдаланиш мажбурий эмас. Сайлов кампанияси давомида Мамдани асосан яшаш харажатлари юқорилиги масаласига эътибор қаратган бўлса-да, у ўзининг мусулмон эътиқодини ҳам очиқ намоён этиб келган. Жумладан, у бешта тумандаги масжидларга тез-тез ташриф буюриб, илк бор овоз бераётган жанубий осиёлик ва мусулмон сайловчиларни ҳам ўз атрофида бирлаштира олган.

Метро бекатида бўлиб ўтадиган қасамёд маросимида Мамдани қўлини иккита Қуръон устига қўяди: бири бобосига тегишли Қуръон, иккинчиси эса XVIII аср охири ёки XIX аср бошларига оид, чўнтак ҳажмидаги Қуръон бўлади. У Нью-Йорк жамоат кутубхонасининг Шомбург қора танлилар маданиятини ўрганиш марказидаги тўпламнинг бир қисми ҳисобланади.

“Қуръоннинг ушбу нусхаси шаҳар мусулмонларининг хилма-хиллиги ва қамровини англатади. Бу Қуръоннинг ҳажми кичик, аммо у Ню Ёрк тарихидаги эътиқод ва ўзига хослик элементларини бирлаштириб туради”, – дейди кутубхона ходими Ҳиба Абид.

2026 йилнинг биринчи куни City Hall биносида бўлиб ўтадиган кейинги расмий маросимда эса Мамдани бобоси ва бувисига тегишли Қуръонлардан фойдаланади. 

• АҚШ
• Nyu-York
• Qasamyod
• Qur’oni Karim