Вашингтонда қуролланган бир эркак АҚШ Миллий гвардияси ҳарбийларига қарата ўқ узди. Хабарларга кўра, ҳодиса Оқ уйдан бир неча квартал нарида содир бўлган. Яраланган  ҳарбийлар шифохонага етказилган, уларнинг иккаласи ҳам ўта оғир аҳволдалиги айтилмоқда.

Дастлаб матбуотда ҳарбийларнинг ҳалок бўлгани ҳақида хабарлар тарқалди, бу ҳақда Виржиния штати губернатори Патрик Морисси баёнот берган эди. Бироқ у кўп ўтмай бу ҳақдаги постини ижтимоий тармоқлардан ўчириб, “қарама-қарши маълумотлар келмоқда”, деб ёзди.

АҚШ мудофаа вазири Пит Ҳегсетнинг айтишича, ҳарбийлар шифохонада ва уларнинг аҳволи оғир.

АҚШ президенти бу ҳужумни “терроризм ҳаракати” деб атади.

Доналд Трампнинг айтишича, АҚШ Ички хавфсизлик вазирлиги ҳужумчи 2021 йилда Афғонистондан Қўшма Штатларга келганини тасдиқлаган.

“Бу бутун халқимизга қарши содир этилган жиноят, бу инсониятга қарши жиноят. Биз Американи яна мутлақо хавфсиз қиламиз”, — деган у.

Шунингдек, Трамп АҚШ расмийлари Жо Байден маъмурияти даврида Афғонистондан мамлакатга кирганларнинг барчасини қайта текшириши кераклигини таъкидлаб ўтган.

Терговга яқин манбаларнинг маълум қилишича, гумонланувчи Афғонистон фуқароси Раҳмонулло Л. экани аниқланган. Федерал қидирув бюроси (ФҚБ) унинг бармоқ излари ва бошқа маълумотларини базалар билан солиштириб, 2021 йили Афғонистондан АҚШга келгани, аввал Вашингтон штатида яшагани ва 2024 йилда сиёсий бошпана сўраб ариза топширганини билдирган, бошпана 2025 йил бошида берилгани ҳақида ҳам хабарлар бор. Ички хавфсизлик идоралари ҳозирда унинг биографияси, алоқалари ва эҳтимолий радикаллашуви бўйича қўшимча текширувлар ўтказмоқда.

Ҳозирда ҳужум уюштирган эркакнинг ўзи ҳам оғир яраланган.

• АҚШ
• Жароҳатлар
• Миллий гвардия
• Муносабат
• Oq uy
• Трамп
• hujum