Бугун, 18 март куни Ўзбекистон Афғонистонга инсонпарварлик ёрдами юборди. Бу ҳақда мамлакат Ташқи ишлар вазирлиги маълум қилди.

Қайд этилишича, ёрдам Рамазон ҳайити муносабати билан Афғонистон аҳолисини қўллаб-қувватлаш ҳамда икки давлат ўртасидаги қўшничилик алоқаларини мустаҳкамлаш мақсадида амалга оширилган.

Умумий оғирлиги 290 тоннадан ортиқ бўлган юк таркибига ун, гуруч, буғдой, ўсимлик ёғи, тез тайёрланадиган озиқ-овқат маҳсулотлари, макарон ва қандолат маҳсулотлари киритилган.

Инсонпарварлик ёрдамини топшириш маросими Ҳайратон шаҳрида бўлиб ўтган. Унда Балх вилояти расмийлари, жумладан губернатор ўринбосари Мавлавий Абу Идрис, шунингдек маҳаллий ҳокимият ва Ташқи ишлар вазирлиги вакиллари иштирок этган.

Тадбирда Ўзбекистоннинг Афғонистондаги элчиси Ойбек Усманов ҳамда Сурхондарё вилояти ҳокими Улуғбек Қосимов ҳам қатнашган.

Балх вилояти расмийлари Ўзбекистон томонига кўрсатилган ёрдам учун миннатдорлик билдирган.

• Афғонистон
• Гуманитар ёрдам
• Hayit
• Ramazon