Тозалик ва озодалик ойлигида Ўзбекистон ҳудуди 422 минг тоннадан кўпроқ чиқиндидан тозаланди.

14 октябрь куни президент Шавкат Мирзиёев раислигида ўтказилган маҳалла тизимини янада такомиллаштириш ва жойларда ишларни самарали ташкил этиш масалалари юзасидан видеоселектор йиғилишида бутун республикада тозалик ва озодалик ойлиги эълон қилинган эди.

Бир ой давомида ҳар бир шаҳар ва туманлар бўйлаб кўчалар, хонадонлар, кўп қаватли уйлар, ижтимоий объектлар, идора ва ташкилотлар атрофида тозалаш ишлари амалга оширилди.

Бу борада, ҳудудлардаги жараёнлар Экология, атроф-муҳитни муҳофаза қилиш ва иқлим ўзгариши вазирлиги ҳамда Чиқиндиларни бошқариш ва циркуляр иқтисодиётни ривожлантириш агентлигида ташкил этилган республика ишчи штабида умумлаштирилиб, Бош прокуратура, Ички ишлар вазирлиги, Миллий гвардия, турли вазирлик ҳамда идоралар ҳамкорлигида олиб борилди.

Жумладан, Ўзбекистон бўйлаб 15 октябрдан — 15 ноябргача ўтказилган “Тозалик ва озодалик” ойлиги доирасида ҳудудлар жами 422,4 минг тонна чиқиндидан тозаланиб, бартараф этилди. Тозалик тадбирлари доирасида 95 213 та МФЙ ҳудуди, шунингдек, 60 631 та жамоат жойи тозаланди.

Ободонлаштириш ишларида санитар тозалаш хизмати ҳамда ободонлаштириш соҳасининг жами 368,8 минг нафар ходимлари иштирок этди. Бундан ташқари жараёнларга 66 291 та махсус чиқинди ташувчи ва юкловчи техника жалб қилинди.

Бир ой давомида Прокуратура, ИИБ, Миллий гвардия ва Экологик давлат назорат инспекцияси ходимлари иштирокида жами 448 минг ҳуқуқбузарлик ҳолати аниқланиб, тегишли тартибда чора кўрилди. Тозалик тадбирларида 100 дан ортиқ ҳамкор ташкилотларнинг 70 301 нафар ходимлари фаол қатнашди.

15 октябрь куни, тозалик ойлигининг илк кунида республиканинг барча ҳудудларида белгиланмаган жойларга чиқинди ташлаш билан боғлиқ 328 та ҳолат аниқланди. Ҳуқуқбузарларга нисбатан жами 224,36 млн сўм миқдорида жарима белгиланди.

• Ўзбекистон
• chqindi