Ўзбекистон ЕОИИ мамлакатлари билан ҳамкорликни ривожлантириш ниятида ва Евроосиё тараққиёт банкига аъзо бўлишга тайёрланмоқда. Бу ҳақда ТАСС ахборот агентлиги Ўзбекистон бош вазири Абдулла Ариповнинг Евроосиё ҳукуматлараро кенгаши йиғилишидаги нутқига асосланиб хабар бермоқда.

 “Ҳозирда Ўзбекистоннинг Евроосиё тараққиёт банкига қўшилиш шартлари ва тартибларини келишиш жараёни давом этмоқда”, – деди Арипов.

Унинг сўзларига кўра, Ўзбекистоннинг тегишли идоралари ва Евроосиё иқтисодий комиссияси департаментлари ўртасида яқин ҳамкорлик бўйича қўшма йўл харитасини мувофиқлаштириш ишлари якунланмоқда.

“Биз ушбу ҳужжатни тасдиқлаш ва қабул қилишда ЕОИИга аъзо давлатлар томонидан қўллаб-қувватланишига умид билдирамиз. Шунингдек, ҳамкасблардан бугунги йиғилишда кўриб чиқилган Ўзбекистоннинг ЕОИИ доирасида амалга оширилаётган электрон технологияларни ривожлантириш, темир йўл транспортини рақамлаштириш, “Агроэкспресс” логистика лойиҳаси ва иқлим ўзгариши бўйича ҳамкорлик каби ташаббуслардаги иштирокини маъқуллашни сўраймиз”, – дея қўшимча қилди Арипов.

Арипов, шунингдек, жорий йил март ва апрел ойларида Тошкент халқаро инвестиция форуми ва “Иннопром: Марказий Осиё” халқаро кўргазмаси бўлиб ўтишини маълум қилди ва Евроосиё ҳукуматлараро кенгаши иштирокчиларини ушбу анжуманга таклиф этди.

• Арипов
• Бош вазир
• ЕОИИ
• хабар