Ўзбекистонда энди ҳайдовчилик ҳуқуқидан маҳрум этилган инсон машина бошқарса, ҳолат камералар томонидан аниқланиб, ҳуқуқбузарга нисбатан чора кўрилади. Бу ҳақда ЙҲХХ ахборот хизмати раҳбари Зоир Йўлдошев хабар берди.

“Ҳайдовчилик ҳуқуқисиз ёки ушбу ҳуқуқдан маҳрум этилган шахсларнинг қонунбузарликлари жамият учун катта кўнгилсизликлар келтириб чиқаришининг олдини олишда энди рақамли технологиялар имкониятларидан кенг фойдаланилади”, – деди Зоир Йўлдошев.

​Унга кўра, ҳозирда Ўзбекистондаги автомобиль йўлларида шахснинг юзини аниқлаш функциясига эга камералар ҳамда фото ва видео қайд этиш қурилмалари ўрнатилган бўлиб, 2026 йилнинг 23 февралидан 3 мартгача тест режимида ишлаган ушбу қурилмалар орқали бир қанча ҳайдовчилик ҳуқуқидан маҳрум этилган фуқароларнинг машина бошқаргани, бошқарув вақтида телефондан фойдалангани аниқланган. Эндиликда ушбу қурилмалар қоидабузарликларга нисбатан онлайн равишда чора кўришни  бошлайди. Бошқарув ҳуқуқидан маҳрум этилган шахсларнинг транспорт воситасини бошқариши Маъмурий жавобгарлик тўғрисидаги кодекснинг 135-моддаси учинчи қисми билан базавий ҳисоблаш миқдорининг 50 баравари — 20,6 миллион сўм миқдорида жарима солишга сабаб бўлади. Агар ҳайдовчилик ҳуқуқидан маҳрум этилган шахс маъмурий жазо қўлланилгандан кейин ҳам автомашина бошқарса, унга нисбатан Жиноят кодексининг 261-2-моддаси (транспорт воситаларини бошқариш ҳуқуқидан маҳрум этилган шахснинг транспорт воситасини бошқариши) билан БҲМнинг 50 бараваридан 100 бараваригача — 20,6 миллион сўмдан 41,2 миллион сўмгача миқдорда жарима ёки икки йилгача ахлоқ тузатиш ишлари ёхуд икки йилдан уч йилгача озодликдан маҳрум этиш билан жазоланади.

• Ҳайдовчи
• Жарима
• Qoidabuzarlik