Сергели тумани суди томонидан 14 август куни Avtotuning.uz автосервиси ходими бўлиб ишлаётган Kia ҳайдовчиси 2 йилга транспорт воситаларини бошқариш ҳуқуқидан маҳрум қилиб, 3 йилга озодликдан маҳрум қилган эди. Бунга сабаб эса унинг пойда вақтида  йўловчини уриб юборгани ва жабрланувчининг вафоти сабаб бўлганди.

Суд-тиббий экспертиза хулосасига кўра, марҳум қўшма жароҳат, бош мия очиқ жароҳати, калла гумбази ва асоси суякларининг бўлакланиб синишлари, бош мия лат ейиши, бош мия тўқимаси ва пардалари остига қон қуйилишлари, кўкрак қафаси ва қорин ёпиқ синишлари, ўпкалар лат еб ёрилишлари, ингичка ичак тутқичи лат еб ёрилиши, ўнг болдир суяклари ўрта-пастки учлигидан очиқ синишлари, чап болдир суяклари пастки учлигидан ёпиқ синишлари, бош, кўкрак қафаси орқа юзаси, ўнг кафт ва ўнг болдир соҳалари эзилиб-йиртилган яралари, бош, юз, тана, қўл ва оёқ соҳалари кўплаб тери шилинмалари каби жароҳатлар олган. Суд қарорида қайд этилишича, ҳайдовчи бир қатор йўл ҳаракати қоидаларини бузган ҳолда 60−70 км/соат тезликда пиёдани уриб юборган.

Айбланувчининг адвокати апелляция шикояти берган. Шундан сўнг, биринчи инстанция суди томонидан жабрланувчи қонуний вакилининг даъвоси йўқлиги, шунингдек, айбланувчининг айбига иқрор ва қилмишидан пушаймонлиги, муқаддам судланмагани, оилада ягона боқувчи экани инобатга олинмаганини таъкидлаган.

Қайд этилишича, Тошкент шаҳри прокуратураси бўлими бошлиғи ўринбосари М.Комилов эса суддан шикоятни қаноатлантирмасликни сўраган.

Бироқ жиноят ишлари бўйича Тошкент шаҳри суди судьяси Музаффар Аҳмедов раислигидаги судлов ҳайъатининг 12 сентябрь куни бўлиб ўтган йиғилишида қамоқда сақланган 4 ой 2 кун жазодан чегирилиб, ўташ учун қолган 2 йил 7 ой 28 кунлик озодликдан маҳрум қилиш жазоси шартли ҳисобланган ва 2 йил синов муддати белгиланган.

ТАъкидланишича, судланувчи назорат органининг рухсатисиз Ўзбекистон ҳудудидан чиқиши тақиқланади ва яшаш ёки ўқиш жойи ўзгаргани тўғрисида хабардор қилиши, шунингдек, ички ишлар органларида рўйхатдан ўтиши шарт.

Ҳозирда унга нисбатан қўлланган қамоққа олиш тарзидаги эҳтиёт чораси бекор қилиниб, у суд залидан озод этилган.

• Автопойга
• Ҳайдовчи
• O'lim