“Ҳурматли соҳа ходимлари, муҳтарам фахрийлар!

Сизларни 8 январь – Ўзбекистон Республикаси прокуратура органлари ходимлари куни билан чин дилдан табриклайман.

Сўнгги йилларда мамлакатимизда барча соҳа ва тармоқлар қатори прокуратура органлари фаолиятида ҳам катта ўзгаришлар амалга оширилди. Тизим ходимлари халққа яқин бўлиб, инсон қадри, унинг ҳуқуқ ва эркинликлари, қонуний манфаатларини, қонун устуворлиги ва адолатни бевосита жойларнинг ўзида таъминлай бошлади.

Айниқса, улар доимий қабуллар ташкил этиб, фуқаролар муаммоларини ҳал қилишда фаол иштирок этмоқда. Биргина ўтган йилда қарийб 512 минг нафар фуқаронинг бузилган ҳуқуқлари тиклангани, 54 мингга яқин мурожаат, жумладан, салкам 29 минг нафар тадбиркорнинг масаласи ечиб берилгани фаолиятингиз самарасини яққол кўрсатиб турибди.

Қурилиш, ер ресурсларидан оқилона фойдаланиш, хотин-қизлар ва ёшларни тазйиқ ва зўравонликдан ҳимоя қилиш, ёқилғи-энергетика ва экология йўналишларида, шунингдек, камбағалликни қисқартириш бўйича янги механизмлар жорий этилгани ҳам ижобий натижа бермоқда.

Бу ҳақда сўз юритганда, яширин иқтисодиётга барҳам бериш борасида кўрилган чоралар туфайли давлат бюджетига 22 триллион 300 миллиард сўм қўшимча тушум ундирилгани, қурилиш соҳасида бюджетдан 3 триллион 900 миллиард сўм ортиқча харажат қилишнинг олди олиниб, ушбу маблағлар қўшимча ижтимоий инфратузилма объектларини барпо этишга йўналтирилганини таъкидлаш лозим.

Криминоген вазиятни чуқур таҳлил қилиш ва тизимли профилактика ишлари асосида маҳаллаларда жиноятчиликни жиловлаш, оғир тоифадаги маҳаллалар сонини қарийб 1,5 баробар камайтиришга эришилди.

Бош прокуратура ҳузуридаги Иқтисодий жиноятларга қарши курашиш департаменти томонидан ўтган даврда 10 мингдан зиёд ҳуқуқбузарлик ва жиноятга чек қўйилди, давлат ва жамият манфаатларига етказилган 1 триллион 800 миллиард сўм зарар ундирилди, 13 мингдан ортиқ шахснинг фаолияти легаллаштирилиб, улар тадбиркор сифатида рўйхатдан ўтказилди.

Ҳуқуқни муҳофаза қилиш академиясида Рақамли криминалистика илмий-тадқиқот институти, шунингдек, кибержиноятларга қарши курашиш бўйича махсус тузилма ташкил этилгани ахборот-коммуникация технологиялари ёрдамида амалга оширилаётган хуружларни аниқлаш, ушбу соҳада малакали кадрларни тайёрлашга хизмат қилмоқда.

Ҳурматли соҳа ходимлари!

Прокуратура идоралари фаолияти самарадорлигини янада ошириш, тизимга илмий ёндашув ва иш услубларини изчил жорий этиш, билимли, ташаббускор ва жонкуяр малакали кадрлар тайёрлаш бўйича бугун олдимизда долзарб вазифалар турганини сизлар албатта яхши тушунасиз.

Жумладан, тергов жараёнларини рақамлаштириш орқали инсон ҳуқуқлари ҳимоясини кучайтиришда прокуратура органларини ҳам назорат идораси, ҳам терговчиларни тайёрлайдиган тизим сифатида янада ривожлантириш – бу замон талаби.

Мамлакатимизда коррупцияга қарши курашиш янги босқичга кўтарилаётган ҳозирги даврда прокурорлик фаолиятида очиқликни янада кучайтириш, сизлар хизмат қилаётган тизимда ва бошқа соҳаларда ушбу иллатга чек қўйишда ҳар бир ходим намуна бўлиши керак. Чунки эл-юртимиз прокуратура органларининг хизматчилари тимсолида қонун посбонлари ва адолат ҳимоячиларини кўради.

Сизлар бундай муносабатни қадрлаб, халқимиз ишончини оқлаш учун бундан буён ҳам сидқидилдан меҳнат қиласиз, деб ишонаман.

Барчангизни касб байрамингиз билан яна бир бор қутлаб, сизларга мустаҳкам соғлиқ, ғоят масъулиятли фаолиятингизда ютуқ ва омадлар, хонадонларингизга тинчлик ва файз-у барака тилайман”, – деган президент.

• Президент
• Прокуратура
• Шавкат Мирзиёев
• Табрик