Бош прокуратура маълумотига кўра, Uzbelas Performance автосервиси раҳбари Асадбек Жумаев иштирокидаги видеоинтервю ўрганиб чиқилган.

Аниқланишича, Жиноят ишлари бўйича Тошкент шаҳар Мирзо Улуғбек тумани судининг 2026 йил 16 январдаги қарорига асосан А.Жумаев Маъмурий жавобгарлик тўғрисидаги кодекснинг 195-2-моддаси (ҳуқуқни муҳофаза қилувчи органлар ходимларининг фото ва (ёки) видеотасвирини уларнинг обрўсизлантирилишига олиб келадиган тарзда бузиб тарқатиш) билан базавий ҳисоблаш миқдорининг 20 баравари миқдорида, яъни 8,4 млн сўм жаримага тортилган.

Бош прокуратура ҳолатга қўшимча ҳуқуқий баҳо бериш мақсадида 26 февраль куни Тошкент шаҳар судининг жиноят ишлари бўйича судлов ҳайъатига протест киритганини маълум қилди.

Маълумот учун, тармоқларда 2026 йилнинг январь ойида Тошкент шаҳри Шаҳрисабз кўчасида BMW русумли иккита транспорт воситаси ЙПХ ходимларининг тўхташ ишорасига бўйсунмасдан ҳаракатлангани тасвирланган видео тарқалган эди. Ҳайдовчилардан бири инспекторни кўрганида тезликни пасайтирган, бироқ тўхтамасдан кетиб қолган, ходим эса машинанинг ортидан ўзининг жезлини отганча қолиб кетган.

Блогер Малик Муҳамедов Асадбек Жумаевдан интервью олиб, ундан ўша воқеа бўйича фикрини сўради. Жумаев бу воқеа учун бошқалар 15 суткага қамалиши, ўзлари эса жарима билан қутулиб қолганини айтган. Ушбу видео ижтимоий тармоқларда тарқалгач, жамоатчилик фаоллари қоидабузар ҳайдовчини, шунингдек, бу ҳолатга беэътибор қолаётган масъулларни қоралади.

• Бош прокуратура
• Qoidabuzarlik
• Суд
• Тошкент