Қорақалпоғистон Республикасидаги аҳоли пунктларининг марказлашган ичимлик сув таъминоти тизимларини комплекс ривожлантириш мақсадида 2,2 триллион сўм маблағ йўналтирилади. Бу ҳақда президентнинг 21 февралдаги қарорида белгиланди.

“Қорақалпоғистон Республикасини 2026 йилда ижтимоий-иқтисодий ривожлантириш ва келгуси йиллар учун мўлжалланган дастурларни тасдиқлаш тўғрисида”ги қарорга мувофиқ, бу пуллар халқаро молия институтлари, давлат бюджети, маҳаллий бюджетлар ва ҳомийлик маблағлари ҳисобидан жалб этилади.

Шундан:

1,8 трлн сўм — халқаро молия институтлари;

299,1 млрд сўм — республика бюджети;

21,4 млрд сўм — маҳаллий бюджет ва унинг қўшимча манбалари;

22,9 млрд сўм — сув таъминоти ташкилотлари маблағлари ва ҳомийлик хайриялари бўлиб, маблағлар 2026—2030 йиллар давомида ажратилади. 

Бу маблағлар ҳисобига 1 719 километр тармоқ тортиш, 56 дона қудуқ қазиш ва чучуклаштирувчи ускуна ўрнатиш, 36 дона сув иншоотларини қуриш режалаштирилган. Бунинг натижасида Қорақалпоғистонда 2030 йилда марказлашган ичимлик суви таъминоти 83,5 фоизга етказилиши мақсад қилинган.

Бундан ташқари, Иқтисодиёт ва молия вазирлиги ва Осиё тараққиёт банки ўртасида эришилган келишувлар доирасида Қорақалпоғистон Республикасини ривожлантириш дастурини 2027 йилдан бошлаб молиялаш тизими бўйича жалб этиладиган 200 миллион доллар ҳисобига амалга ошириладиган лойиҳалар тасдиқланган.

Жумладан, бу пуллар ҳисобидан Амударё туманида 6 та маҳалла фуқаролар йиғинига 107,1 километр ичимлик суви тармоғини янгидан қурилади, 1 та насос станцияни ҳамда туман марказидаги мавжуд локал сув тозалаш иншооти реконструкция қилинади. Тахиатош туманининг 2 та маҳалла фуқаролар йиғинига 89,9 километр ичимлик сув тармоғи ҳамда 3 та сув тақсимлаш иншоотини қуриш, реконструкция қилишга маблағ ажратилади.

Элликқалъа тумани маркази Бўстон шаҳрида 35,7 километр марказлашган канализация тизими ҳамда 5 та оқова сув тозалаш иншооти қурилади. Беруний тумани марказида 35,7 километр марказлашган канализация тизимини ҳамда 4 та оқова сув тозалаш иншоотлари янгидан қурилади.

Қорақалпоғистонда марказлашган ичимлик сув таъминотини яхшилаш учун 2,2 триллион сўм йўналтирилиши 20 февраль куни Шавкат Мирзиёев раислигида ўтказилган йиғилишда маълум қилинганди. Президент яна бир қатор вазифаларни белгилаб, унга эришиш учун барча имконият ва ресурсларни тўлиқ ишга солишни топширганди. 

• Ичимлик суви
• Президент
• Қарор
• Қорақалпоғистон