14 кундан буён Украина кўчаларида отишмалар, снарядларнинг портлаши, жон талвасасида қичқираётган ярадор аскарнинг овози эшитилмоқда. Ҳар икки томон жиддий йўқотишларга учраган. Деярли бир ҳафтадан бери қамалда қолган Мариуполда одамлар бомба ёмғиридан беркиниб тунни ўтказмоқда. 

Ушбу мақолада Россия Украина ўртасида кечаётган урушнинг ўн учинчи куни асосий воқеалари ва фотосуратларини тўпладик.

8 март кунига ўтар кечаси Россия авиацияси Броваридаги кимёвий моддалар омбори ва Житомир вилоятидаги нефть базасини ўққа тутди. Бундан ташқари Суми ва унинг атрофидаги аҳоли пунктларига ҳам авиазарба берилган. Бунинг оқибатида 10 дан ортиқ киши, жумладан, бир нечта бола ҳалок бўлган. 

Ўша куни туш вақтида Россия ҳарбийлари икки соат давомида Ахтирка шаҳрини бомбардимон қилди. Шаҳар ҳокимининг таъкидлашича, шаҳардаги деярли барча бинолар вайронага айлантирилган.

"Темирйўл вокзали, ижроия қўмита биноси, ўлкашунослик музейи, маҳаллий универсал дўкон ва барча савдо бинолари бутунлай вайрон бўлган. Иссиқлик электр станцияси ўчирилган, электр йўқ, канализация коллектори вайрон бўлган, сув таъминоти қисман йўқ", – дейди шаҳар ҳокими Павел Кузменко.

Украина Қуролли кучлари Бош штаби душман Киевга ҳужум уюштириш учун қайта тўпланганини маълум қилмоқда. Маълумотларга кўра, Россия кучларининг асосий саъй-ҳаракатлари ҳамон Киев, Харьков, Мариуполь, Николаев, Чернигов ва Сумини ўраб олиш ҳамда эгаллашга қаратилган.

• Kiyev
• Россия
• Украина
• Уруш
• vayronagarchilik