Буюк Британия қиролининг кенжа ўғли – шаҳзода Гарри жорий йилнинг 6 май куни отаси, қирол Чарльз III нинг тож кийиш маросимида иштирок этади. Унинг рафиқаси Меган Маркл эса фарзандлари – шаҳзода Арчи ва малика Лилибет билан АҚШда қолади.

74 ёшли Чарльз III нинг тож кийиш маросимида умумий ҳисобда 2000 нафар меҳмон иштирок этади. Маросим 6 май куни, қиролича Елизавета II вафотидан роппа-роса 8 ой вақт ўтиб, Лондондаги Вестминстер аббатлигида ўтказилади.

Тож кийиш маросимига бугунги кунга қадар Бельгия, Венгрия, Ирландия, Испания, Монако, Франция етакчилари, Евроиттифоқ раҳбарлари ва Шотландиянинг янги вазири Ҳамза Юсаф ҳам таклиф этиб улгурилган. АҚШ президенти Жо Байден эса маросимда унинг номидан рафиқаси Жилл Байден иштирок этишини маълум қилган.

Эслатиб ўтамиз, шаҳзода Гарри ва унинг рафиқаси Меган Маркл 2020 йилнинг январь ойида Британия қироллик оиласи унвонларидан воз кечишга қарор қилишган. Жуфтлик шу тариқа турли сафарларда Англия монархининг расмий вакили сифатида қатнашиш, имтиёзлардан фойдаланиш имкониятидан маҳрум бўлиб, яшаш учун АҚШга кўчиб ўтган.

• Буюк Британия
• Чарлз III
• Жаҳон
• Qirolicha
• машҳурлар
• qirol
• хабар