Сирдарё вилоятида Гулистон шаҳар ободонлаштириш бошқармаси масъул шахслари томонидан 1 млрд сўмлик бюджет маблағлари ўзлаштирилгани аниқланди. Бу ҳақда Бош прокуратура ҳузуридаги Департаментнинг Сирдарё вилояти бошқармаси хабар берди.

Қайд этилишича, терговга қадар текширув давомида бошқарма масъул шахслари айрим фуқароларни ишчи сифатида расман ишга қабул қилгани аниқланган. Бироқ ушбу фуқаролар амалда ишламаган бўлса-да, уларга жами 1 млрд сўм миқдорида иш ҳақи ҳисобланган.

Тергов материалларига кўра, ҳисобланган маблағлар масъул шахслар томонидан шахсий эҳтиёжлари учун сарфланган. Шу орқали бюджет маблағлари ўзлаштириш ёки растрата йўли билан талон-торож қилинган.

Мазкур ҳолат юзасидан Жиноят кодексининг 167-моддаси — ўзлаштириш ёки растрата йўли билан талон-торож қилиш моддаси билан жиноят иши қўзғатилган.

Ҳозирда ҳолат юзасидан тергов ҳаракатлари олиб борилмоқда.