Ўзбекистон PISA 2025 халқаро тадқиқотида 91 та давлат ва таълим тизими қаторида иштирок этди. Мамлакат мазкур халқаро баҳолаш дастурида иккинчи бор қатнашмоқда.

PISA — Иқтисодий ҳамкорлик ва тараққиёт ташкилоти (ОЭCД) томонидан ўтказиладиган халқаро тадқиқот бўлиб, у 2000 йилдан буён ҳар уч йилда бир марта ўтказиб келинади.

PISA 2025 натижаларига кўра, Ўзбекистон ўқувчилари табиий фанлар бўйича 438 балл тўплаб, 91 та давлат ва таълим тизими орасида 48-ўринни эгаллаган.

Таққослаш учун, PISA 2022 тадқиқотида Ўзбекистоннинг табиий фанлар бўйича натижаси 355 балл ва 80-ўринни ташкил этган. Шу тариқа, 2025 йилда мазкур йўналишдаги натижа 83 баллга ошган.

PISA 2025 тадқиқоти учун OECD томонидан Ўзбекистонда тасодифий репрезентатив танлов асосида 233 та мактаб танланган. Унда 15 ёшли 8 652 нафар ўқувчи иштирок этган.

2022 йилги тадқиқотда эса Ўзбекистоннинг 202 та мактабидан 7 293 нафар ўқувчи қатнашган. Демак, бу сафар тадқиқотга жалб этилган мактаблар ва ўқувчилар сони ҳам ошган.

PISA тадқиқотида ўқувчиларнинг математика, табиий фанлар, ўқиш ва рақамли саводхонлик бўйича билим ва кўникмалари баҳоланади. PISA 2025да эса табиий-илмий саводхонлик асосий баҳолаш йўналиши сифатида белгиланган.

Ўзбекистоннинг табиий фанлар бўйича натижаси аввалги тадқиқотга нисбатан сезиларли ошгани мамлакат таълим тизимидаги ижобий ўзгаришлардан бири сифатида қайд этилмоқда.