Колумбиялик машҳур хонанда Шакира Қирғизистон пойтахти Бишкек шаҳрида концерт беради. Бу ҳақда Қирғизистон Президенти ишлар бошқармаси раҳбари Канибек Туманбаев маълум қилди.

Туманбаев ижтимоий тармоқдаги саҳифасида Шакиранинг видеосини жойлаштириб, хонанданинг тез орада Бишкек Аренада чиқиш қилишини билдирган. Бироқ ҳозирча концертнинг аниқ санаси ва бошқа тафсилотлари расман эълон қилинмаган.

Янги Бишкек Арена 51 минг томошабинга мўлжалланган. Аввалроқ ушбу мажмуада VI Жаҳон кўчманчилар ўйинларининг очилиш маросими ўтказилган. Тадбирда америкалик хонанда Никол Шерзингер ҳам иштирок этган.

Шакира футбол мухлисларига ҳам яхши таниш. У 2010-йилги Жаҳон чемпионатининг расмий қўшиғи сифатида танланган “Wака Waka (This Time for Africa)” таронасини ижро этган.

Хонанда аввал “Барселона” ва Испания терма жамоаси собиқ футболчиси Жерар Пике билан муносабатда бўлган. Уларнинг икки нафар фарзанди бор.