Бугун, 21 февралдан “Ташаббусли бюджет”нинг 2026-йилги биринчи мавсуми учун лойиҳа киритиш босқичи расман якунланди. Бу ҳақда Молия ва иқтисодиёт вазирлиги хабар берди. 

Мазкур жараён 1 февраль куни бошланган бўлиб, 20 февралга қадар давом этди. Ушбу давр мобайнида фуқаролар томонидан жами 21 049 та лойиҳа таклифи тақдим этилган.

Эндиликда жараённинг навбатдаги босқичи – лойиҳаларни саралаш ишлари бошланади. Ушбу босқич 21 февралдан 7 мартга қадар давом этади. Саралаш жараёнида тақдим этилган ташаббусларнинг белгиланган мезон ва талабларга мувофиқлиги ва амалга ошириш имконияти ўрганилади.

Саралашдан муваффақиятли ўтган лойиҳалар кейинги босқич – овоз бериш жараёнига қўйилади. Овоз бериш натижаларига кўра энг кўп қўллаб-қувватланган ташаббуслар молиялаштирилади ва амалиётга жорий этилади.

“Ташаббусли бюджет” дастури аҳоли фаоллигини ошириш, ҳудудлардаги муаммоларни бевосита фуқаролар иштирокида ҳал этиш ҳамда бюджет маблағларидан фойдаланишда очиқлик ва шаффофликни таъминлашга қаратилган.

• опен бюджет