5 октябрдан Тожикистон ва Эрон фуқаролари учун ўзаро визасиз режим тўлиқ кучга кирди. Эндиликда икки давлат фуқаролари амалдаги хорижга чиқиш паспорти билан қуруқликдаги чегара пунктлари ва халқаро аэропортлар орқали визасиз кириши, транзит ўтиши ёки вақтинча бўлиши мумкин. Бу ҳақда Тожикистон Ташқи ишлар вазирлиги Ахборот хизмати бошлиғи ўринбосари Саиджон Шафизода Асиа-Плусъга маълум қилди.

Ўзаро англашув меморандуми қоидаларига кўра, фуқароларга ҳар 90 кунлик давр ичида 30 кунгача қолишга рухсат этилади. Визасиз режим учинчи давлатлардан ҳаво йўллари орқали кириб келишга ҳам татбиқ этилади, бунда тегишли миллий қонунчилик талабларига риоя қилиш лозим.

Мазкур тартиб узоқ муддат яшаш ёки ишлаш ҳуқуқини автоматик равишда бермайди. Бундай мақсадлар учун Тожикистон ва Эрон қонунчилигида белгиланган алоҳида талаблар бажарилиши керак.

Тожикистон ва Эрон ўртасидаги визасиз режим 2024 йил 10 августда жорий этилган бўлиб, дастлаб фақат Душанбе–Теҳрон ва Теҳрон–Душанбе ҳаво йўналишларига татбиқ этилган. Қуруқликдаги чегара пунктлари ва учинчи давлатлар орқали сафар қилувчилар учун эса виза талаб қилинган.

Эндиликда визасиз тартибнинг амал қилиш доираси кенгайтирилиб, қуруқликдаги чегара пунктлари ҳам қамраб олинди. Шу билан бирга, икки давлат ўртасидаги тўғридан-тўғри авиақатновлар ҳам 2026 йил 31 май куни уч ойлик танаффусдан сўнг қайта тикланган.