Тошкент вилоятининг Зангиота туманида юк машинаси кўприкка урилиб, тўхтаб қолди. Бу ҳақда вилоят Йўл ҳаракати хавфсизлиги бошқармаси хабар берди.

Маълум бўлишича, кеча, 26 сентябрь куни соат 19:00 ларда Зангиота туманида юк машинасининг ҳайдовчиси тақиқловчи белгига амал қилмай, габарит ўлчамлари тўғри келмаган транспорт воситасида кўприкнинг пиёдалар ҳаракатланиши учун мўлжалланган қисмидаги бетон тўсинга бориб урилган.

Шундан сўнг, воқеа жойига йўл ҳаракати хавфсизлиги ходимлари етиб бориб, юзага келган ҳолатни бартараф қилган.

Ушбу ҳодисада ҳаракат иштирокчиларининг соғлиғи ва кўприкнинг автомобиллар ҳаракатланиш учун мўлжалланган қисмига зиён етмаган. Фақатгина кўприкнинг пиёдалар ҳаракати учун мўлжалланган қисми шикастланган. Ҳозирда шикастланган қисмни таъмирлаш чоралари кўрилмоқда ва автомобилларнинг эркин ҳаракатланиши тўлиқ йўлга қўйилган.

Шунингдек, ҳолат юзасидан Зангиота тумани ИИБ ЙҲХБ томонидан суриштирув ишлари олиб борилмоқда.

• Toshkent viloyati
• Zangiota
• yuk mashinasi