Пойтахт ИИББ матбуот хизмати хабарига кўра, Тошкент шаҳри Юнусобод туманида жойлашган масъулияти чекланган жамият ертўласидан ичида 50 минг доллар бўлган сейфни ўғирлаган “курьер” ва унинг шериклари ушланди.

ИИО га келиб тушган хабар асосида Тошкент шаҳар ИИББ тезкор қидирув хизмати жиноят қидирув бошқармаси томонидан жиноятда гумонланганларни аниқлаш мақсадида тезкор қидирув тадбирлари ўтказилган. Натижада мазкур жиноят ташкилотчиси 1988 йилда туғилган Бобур исмли шахс, 2000 йилда туғилган Шерзод ва мазкур МЧЖда ҳайдовчи лавозимида ишловчи Абдураҳмон исмли шахс қўлга олинган.

Маълумотларга кўра, жиноят содир этилиши ва пулларнинг ўғирланишида мазкур МЧЖда ҳайдовчи бўлиб ишловчи Абдураҳмон исмли шахс ёрдамлашган, яъни офисга пулларни ўғирлашга келган Шерзодга самокат, буюртма етказувчилар сумкаси ва шлем каскасини берган. У эса тунда Юнусобод туманида жойлашган офисга бориб, ертўладаги ичида 50 минг АҚШ доллар пули бўлган сейфни олиб, воқеа жойидан яширинган.

Мазкур ҳолат юзасидан Юнусобод тумани Ички ишлар органлари фаолиятини мувофиқлаштириш бошқармаси тергов бўлими томонидан Жиноят кодексининг 169-моддаси (ўғрилик) билан жиноят иши қўзғатилган. Мазкур моддага кўра, суд ҳукми билан 15 йилгача озодликдан маҳрум қилиш жазоси назарда тутилган.

• Жиноят
• O'g'irlik
• Тошкент
• Юнусобод тумани