2024 йил 10 август – 10 сентябрь кунлари Экология, атроф-муҳитни муҳофаза қилиш ва иқлим ўзгариши вазирлиги ҳамда Ўзбекистон Бадиий ижодкорлар уюшмаси томонидан "Тошкент – 2024" III халқаро ҳайкалтарошлик симпозиуми ўтказилади. Бу ҳақда Экология, атроф-муҳитни муҳофаза қилиш ва иқлим ўзгариши вазирлиги хабар берди.

Қайд этилишича, симпозиумда Ўзбекистон ҳамда хорижий давлатларнинг тажрибали, маҳоратли ҳайкалтарошлари томонидан "Ҳайкалтарошлик ва атроф-муҳит" мавзусида тошдан ижод асарлари яратилади. Шунингдек, ёш ижодкорлар учун маҳорат дарслари, амалий машғулотлар ташкил этилади, "устоз-шогирд" анъаналари намойиш қилинади. 

Бундан ташқари, симпозиум иштирокчилари учун Тошкент шаҳри, Бухоро ва Тошкент вилоятларидаги музейлар ҳамда маданий мерос объектларига саёҳатлар уюштирилади.

“Симпозиум давомида яратилган бетакрор бадиий ечимга, ғояга эга бўлган, юксак эстетик талаб даражасидаги ҳайкаллар Тошкент шаҳрининг маданий муҳити ва бадиий қиёфасини шакллантириш мақсадида истироҳат боғлари, дам олиш зоналари, кўнгилочар ва сайёҳлик масканларига, шу билан бирга, Марказий Осиё атроф-муҳит ва иқлим ўзгаришини ўрганиш университети (Греэн University)га  ўрнатилади”, дейилади хабарда.

Симпозиум якунида иштирокчиларга сертификатлар ва гонорарлар топширилади.

• Экология
• haykaltaroshlik