Украина президенти Владимир Зеленский Дублинга ташрифи чоғида Ирландия бош вазири Михол Мартин билан Россиянинг музлатилган активларини мамлакат мудофааси ва тикланишини қўллаб-қувватлаш учун ажратиш имкониятини муҳокама қилди.

Бу ҳақда Украина раҳбари ўзининг Telegram саҳифасида маълум қилди.

“Биз бугун Россиянинг музлатилган активлари бўйича позицияни ҳам муҳокама қилдик. Мудофаамизни ҳам, қайта қуришимизни ҳам ишончли таъминлай олишимиз учун уларни Украинага ўтказиш вақти келди”, – дея таъкидлади у ҳамкорларини Россияни қонуний жавобгарликка тортиш бўйича биргаликдаги саъй-ҳаракатларда фаолроқ иштирок этишга чақирди.

Мартин, ўз навбатида, Ирландия ушбу активлардан Украинани қайта қуришни молиялаштириш ва кредитлар бериш учун фойдаланишни қўллаб-қувватлашини айтди.

Томонлар, шунингдек, Россияга қарши санкцияларни кучайтиришни ҳам муҳокама қилишган. Зеленскийнинг таъкидлашича, Россияга қарши чекловлар вазият ҳал этилмагунча муҳим таъсир воситаси бўлиб қолади.

Зеленский Ирландияга энергия ва инсонпарварлик ёрдами учун миннатдорчилик билдирди ва мамлакатлар келгуси беш йил учун ҳамкорлик йўл харитасини тасдиқлаганини маълум қилди.

• Ирландия
• Президент
• Украина
• Зеленский