Литва пойтахти Вильнюс чиқиндиларни қайта ишлаш билан боғлиқ вазият кескинлашмоқда. Шаҳарда тўпланиб қолган чиқиндилар ҳажми ортиб бораётгани сабаб давлат даражасида фавқулодда ҳолат жорий этиш масаласи кўриб чиқилмоқда.

Маълумотларга кўра, 2026 йил июлига келиб Вильнюс қайта ишланмаган чиқиндилар ҳажми 20 минг тоннадан ошган. Чиқиндилар омборлар, очиқ майдонлар ва уларни олиб чиқадиган йўллар бўйларида тўпланиб қолган. Шаҳарнинг айрим ҳудудларида ёқимсиз ҳид ҳам тарқалган.

Муаммо 2025 йил апрель ойида шаҳардаги асосий чиқиндиларни қайта ишлаш заводида ёнғин содир бўлганидан кейин бошланган. Завод оператори — Energesman корхонаси фаолиятни тиклашга ваъда берган бўлса-да, маблағ етишмаслиги сабабли бу жараён чўзилиб кетган.

Вильнюс минтақасида ҳар куни қарийб 700 тонна чиқинди ҳосил бўлиши вазиятни янада мураккаблаштирмоқда. Заводнинг асосий омбори тўлиб қолгани сабаб чиқиндиларни вақтинча бошқа ҳудудларга олиб чиқишга тўғри келган.

Аҳолининг норозилигидан сўнг маҳаллий ҳокимият муаммони бартараф этиш чораларини кучайтирган. Жумладан, айрим чиқинди тўпланадиган ҳудудларда тозалаш ишлари кечаси амалга оширилмоқда.

Шу билан бирга, май ойида Energesman компанияси заводни модернизация қилиш бўйича 14 миллион евролик тендерда ғолиб чиққан. Бироқ маблағ компаниянинг аввалги қарзларини қоплашга сарфланиши мумкинлигидан хавотир билдирилиб, дастлабки аванс тўловлари блокланган.

Натижада Вильнюс чиқиндиларни қайта ишлаш инфратузилмасини тиклаш ва тўпланиб қолган чиқиндиларни бартараф этиш масаласи долзарб муаммолардан бирига айланган.