“Ўзбекистонда спорт трансляцияларини амалга оширишда рақобатлашаётган компанияларнинг дўстона муносабатлари йўлида муҳим воқеага айланади”,– деди Даврон Файзиев.

Бошланаётган футбол мавсумида спорт мухлисларини яна бир ажойиб янгилик кутмоқда. Эндиликда Спорт ТВ телеканалида эфирга узатилаётган муҳим турнирларни Узрепорт ва Футбол ТВ шарҳловчилари ҳам шарлаш имкониятига эга бўладилар:

“Мавсум бошланиши арафасида бир янгиликни сизга маълум қиламиз. Бизга Еврокубоклар, қолаверса барча нуфузли турнирлар ҳамда ЖЧни шаҳрлашимиз талаби билан футбол мухлисларидан минглаб мурожаатлар келиб тушади. (Бу албатта қувонарли ҳол, сал бўлса ҳам эътиборига тушганимиздан бағоят хурсандмиз). Лекин шу кунгача бунинг имкони йўқ эди. Чунки мамлакатимизда йирик турнирлар транслясияси икки хил телекомпания томонидан амалга оширилади ва шарҳловчилар бўлинган ҳолатда ишлашга мажбур.

Юқорида айтганимдек, бу ҳол мухлислар эътирозига сабаб бўлаётганди. Шуни инобатга олган ҳолда, Узрепорт ҳамда Спорт телеканаллари истисно тариқасида мен ва ҳамкасбим Хайрулла Ҳамидовга иккала телеканал орқали йирик мусобақаларни мухлислар учун шарҳлаб бориш имкониятини тақдим этишди. Шу муносабат билан бизга ана шу таклиф билан чиққан Спорт-ТВ директори Зоҳид Каримовга ҳамда бизнинг ва мухлисларнинг истагига бефарқ бўлмай, ана шу амалиётга розилик билдиргани учун Узрепорт ва Футбол ТВ асосчиси Равшан Джураевга миннатдорчилик билдирамиз. Бу қадам Ўзбекистонда спорт трансляцияларини амалга оширишда рақобатлашаётган компанияларнинг ўзаро дўстона муносабатлари йўлида муҳим воқеага айланади деб умид қиламиз.

Ишонамизки, бошланаётган фантастик мавсум давомида телетомошабинлар билан бирга унутилмас лаҳзаларни бошдан кечирамиз!”, – дейди Даврон Файзиев.

• Футбол
• Ўзбекистон
• Трансляция