Янги ҳарбий ёрдам пакети доирасида Испания Украинага ҳозирда етишмаётган IRIS-T батареялари учун ракеталар беради.

Бу ҳақда Украина президенти Владимир Зеленский Мадридда Испания бош вазири Педро Санчес билан ўтказган матбуот анжуманида маълум қилди.

“Бу ҳаво ҳужумидан мудофаа ракеталарини ҳам ўз ичига олади. Бизда қиш мавсумида катта тақчиллик бор. Бунда аниқ пакет — IRIS-T ҳаво мудофаа тизимлари учун 40 та ракета”, – деган Украина раҳбари.

Шунингдек, Зеленский ва Санчес учрашувида мудофаа соҳасидаги ҳамкорлик, Украина энергетика соҳасидаги муаммолар ва дипломатик вазият муҳокама қилинган.

“Бугун биз Россиянинг доимий зарбалари шароитида мудофаа соҳасидаги ҳамкорлигимизга катта эътибор қаратмоқдамиз. Украина Испаниянинг ёрдам беришга тайёрлигини ва келажакда бу давом этишини чин дилдан қадрлайди”, – дейди Зеленский.

Унга кўра, Украина ва Испания биргаликда юқори аниқликдаги қуролларни ишлаб чиқаришга тайёр.

• Ispaniya
• Raketa
• Украина
• Зеленский