Туркиянинг Истанбул, Ялова ва Кожаэли вилоятларида кучли ёмғир ва шамол кутилаётгани сабабли у ерда яшаётган ёки вақтинча бўлиб турган Ўзбекистон фуқаролари огоҳлантирилди. Бу ҳақда Ўзбекистоннинг Истанбул шаҳридаги Бош консулхонаси маълум қилди.

Консуллик маълумотига кўра, ноқулай об-ҳаво сув тошқинлари, йўлларда ҳаракатланишнинг қийинлашиши ва бошқа фавқулодда ҳолатларга сабаб бўлиши мумкин. Шу боис фуқароларга зарурат бўлмаса, узоқ масофаларга сафар қилмаслик, пастқам ҳудудлар, ерости йўллари ва туннеллардан узоқроқ бўлиш тавсия этилди.

Шунингдек, денгиз соҳиллари, дарахтлар, электр узатиш тармоқлари ва мустаҳкам ўрнатилмаган конструксиялар яқинида эҳтиёткорликни ошириш, автомобиль бошқаришда тезликни камайтириш ҳамда хавфсиз масофани сақлаш сўралган. Фуқароларга Туркия ваколатли идораларининг расмий огоҳлантириш ва тавсияларига амал қилиш тавсия этилди.

Бош консулхона фуқароларни ўз хавфсизлиги ва яқинларининг саломатлигига алоҳида эътибор қаратишга чақирди.

Аввалроқ Бош консулхона маълумотига кўра, Туркияда қарийб 130 минг нафар Ўзбекистон фуқароси истиқомат қилган. Уларнинг 80 минг нафари қонуний, 50 мингга яқини эса ноқонуний равишда мамлакатда яшаган.

Маълумот учун, Истанбулда кучли ёмғир ва бўрон оқибатида сув тошқинлари юз бергани, икки киши ҳалок бўлгани ва кўплаб уйлар ҳамда иш жойларига зарар етгани хабар қилинган. 15 октябрь куни шаҳардаги давлат ва хусусий таълим муассасаларида дарслар бекор қилинган.