Bosh prokuratura huzuridagi Departamentning Qibray tumani bo‘limi va boshqa huquqni muhofaza qiluvchi organlar xodimlari hamkorligida o‘tkazilgan tezkor tadbirda fuqaro Sh.Sh. “Zafarobod” MFY hududidagi xonadonda umumiy bahosi 7 mlrd so‘mlik sifati kafolatlanmagan va yaroqlilik muddati o‘tgan dori vositalari hamda tibbiy buyumlarni sotish maqsadida saqlab kelayotgani aniqlangan.

Departamentning Qo‘qon shahri bo‘limi va boshqa huquqni muhofaza qiluvchi organlar xodimlari hamkorligida o‘tkazilgan tezkor tadbirda fuqaro M.A. (muqaddam sudlangan) “Mahmud Tarobiy” ko‘chasidagi xonadonida sifati kafolatlanmagan umumiy bahosi 289,2 mln so‘mlik 46 turdagi 18 473 quti dori vositalari va tibbiy buyumlarni sotish maqsadida saqlab kelayotgani aniqlanib, ushbu dori vositalari va tibbiy buyumlar ashyoviy dalil sifatida olingan.

Departamentning Uchtepa tumani bo‘limi va boshqa huquqni muhofaza qiluvchi organlar xodimlari hamkorligida o‘tkazilgan tezkor tadbirda fuqaro J.A. boshqaruvidagi BYD rusumli avtotransport vositasi ko‘zdan kechirilganda, uning salonida 4 turdagi 26 quti dori vositalari borligi aniqlangan. Tadbir davomida J.A.ning xonadonidan chet elda ishlab chiqarilgan sifati kafolatlanmagan 85 turdagi 5 452 dona dori vositalari va 24 quti kuchli ta’sir qiluvchi dori vositalari ashyoviy dalil sifatida olingan.

Departamentning Qashqadaryo viloyati boshqarmasi tomonidan o‘tkazilgan tezkor tadbirda fuqaro D.A. “Qarluqbog‘ot” MFY hududidagi xonadoni yerto‘lasida umumiy bahosi 262,5 mln so‘mlik 154 turdagi 4 613 dona sifati kafolatlanmagan dori vositalari va tibbiy buyumlarni kelgusida sotish maqsadida saqlab kelayotgani aniqlanib, ushbu mahsulotlar ashyoviy dalil sifatida olingan.

Shuningdek, Qo‘qon shahrida o‘tkazilgan yana bir tezkor tadbirda fuqaro O.Sh. fuqaro M.B.ning xonadonida sifatini tasdiqlovchi hujjatlari bo‘lmagan umumiy bahosi 257,6 mln so‘mlik 26 turdagi 1 925 quti dori vositalarini sotish maqsadida saqlab kelayotgani aniqlanib, ushbu dori vositalari ashyoviy dalil sifatida olingan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.