“O‘zbekistonning yangi tayinlangan Favqulodda va Muxtor Elchisi Abat Fayzullayev (qarorgohi Rim shahrida joylashgan) Kipr Respublikasi prezidenti Nikos Xristodulidisga ishonch yorliqlarini topshirdi”, – deb xabar qilmoqda Dunyo axborot agentligi. Kipr Respublikasi yetakchisi xorijiy diplomatlardan ishonch yorliqlarini qabul qilish marosimidagi nutqida yangi elchilarni samimiy qutlab, ularga o‘z vazifalarni amalga oshirishda muvaffaqiyatlar tiladi, shuningdek, ikki va ko‘p tomonlama munosabatlarni rivojlantirishda munosib hissa qo‘shishiga umid bildirgan.

Kipr Respublikasi prezidenti O‘zbekiston bilan munosabatlar istiqbollariga alohida to‘xtaldi. “O‘zbekiston bilan ikki tomonlama, shuningdek, Yevropa Ittifoqi doirasidagi hamkorlik aloqalarini rivojlantirishga alohida e’tibor qaratamiz”, – degan prezident Nikos Xristodulidis.

Abat Fayzullayev Kiprga tayinlangan O‘zbekistonning birinchi elchisi bo‘ldi. U 2023-yil oktyabr oyida O‘zbekistonning Italiyadagi elchisi lavozimiga tayinlangan edi.

• Elchi
• Kipr