“Toshkent-AERO” ixtisoslashtirilgan bojxona kompleksida qiymati 1,3 milliard so‘mga yaqin zargarlik buyumlari va oltin quymalarini yashirincha olib kirishga uringan fuqaro ushlandi. Bu haqda bojxona kompleksi matbuot xizmati xabar berdi.

Qayd etilishicha, fuqaro “Dubay–Toshkent” yo‘nalishi bo‘yicha O‘zbekistonga kirib kelgan. Uning yuklari bojxona nazoratidan o‘tkazilganda, deklaratsiyada ko‘rsatilmagan zargarlik buyumlari va oltin quymalari aniqlangan.

Xususan, yuklar orasidan sof og‘irligi 921,37 gramm bo‘lgan 141 dona zargarlik buyumi hamda uchta oltin quyma topilgan.

Ekspertiza xulosasiga ko‘ra, aniqlangan zargarlik buyumlari va oltin quymalarning umumiy qiymati 1 milliard 293 million so‘mni tashkil etgan.

Bundan tashqari, fuqaroning yuklari orasidan aksiz markalarisiz 120 quti tamaki mahsuloti hamda 90 dona nikotinli snyus aniqlangan.

Holat yuzasidan jinoyat ishi qo‘zg‘atilgan. Hozirda tergov harakatlari olib borilmoqda.

Avvalroq Namangan aeroportida besh nafar fuqaroning qiymati 1,1 milliard so‘mlik oltinni yashirincha Hindistonga olib chiqishga uringani aniqlangandi.