Andijon shahridagi ko‘p qavatli uyda kecha, 11-fevral kuni gaz-havo aralashmasi chaqnashi sodir bo‘ldi. Bu haqda FVB axborot xizmati xabar berdi.

Ma’lum qilinishicha, chaqnash soat 23:55 da “Nodirabegim” MFY hududida joylashgan ko‘p qavatli uy xonadonlaridan birida vujudga kelgan. Xabarga asosan FVB rahbariyati hamda qutqaruv bo‘linmalari zudlik bilan voqea joyiga yetib borgan.

Dastlabki ma’lumotlarga ko‘ra, hodisa oqibatida yong‘in kelib chiqmagan va ko‘p qavatli uyning boshqa xonadonlariga zarar yetmagan. Qutqaruvchilar tomonidan hudud ko‘zdan kechirilib, xavfsizlik choralarini ta’minlash bo‘yicha zarur tadbirlar amalga oshirilgan.

Hozirda vaziyat nazoratga olingan. Chaqnash oqibatida ikki nafar fuqaro tan jarohati olgan. Jarohatlanganlarning ahvoli yuzasidan qo‘shimcha ma’lumot berilmagan.

• Andijon
• FVB
• portlash