Toshkent metropolitenida 21-sentabr kuni yo‘lovchi tashish bo‘yicha yangi rekord qayd etildi. Bu haqda “Toshkent metropoliteni” AJ matbuot xizmati xabar berdi.

Ma’lum qilinishicha, shu kuni metro xizmatlaridan 1 mln 181 ming 581 nafar yo‘lovchi foydalangan.

Avvalgi rekord 14-sentabr kuni qayd etilgan bo‘lib, o‘shanda metropolitenda 1 mln 165 ming 550 nafar yo‘lovchi tashilgan. Yangi ko‘rsatkich avvalgi rekorddan 16 ming 31 nafarga ko‘p.

Mutaxassislar monitoringi yo‘lovchilar oqimi o‘sishda davom etayotganini ko‘rsatmoqda. Mavjud ko‘rsatkichlardan kelib chiqib, oktabr oyida Toshkent metrosida bir kunda tashiladigan yo‘lovchilar soni 1,2 million nafarga yetishi kutilmoqda.

Shu munosabat bilan metropolitenda 1 million 200 minginchi yo‘lovchini aniqlash va unga maxsus imtiyoz yoki sovg‘a taqdim etish rejalashtirilmoqda.

Eslatib o‘tamiz, 15-sentabr kuni Toshkent shahar avtobuslarida ham yo‘lovchi tashish bo‘yicha rekord qayd etilgandi. O‘sha kuni avtobuslardan 1 mln 520 ming 113 nafar yo‘lovchi foydalangan.