Bangkok – Moskva yo‘nalishida parvoz qilayotgan Aeroflot samolyoti kasal bo‘lib qolgan ayol tufayli Samarqandga favqulodda qo‘nishga majbur bo‘ldi. Bu haqda RBC nashri xabar berdi.

“2023-yil 12-yanvar kuni Bangkok-Moskva SU271 reysini amalga oshirayotgan samolyot yo‘lovchining sog‘lig‘i yomonlashgani sababli Samarqand aeroportiga favqulodda qo‘nishga majbur bo‘ldi”, – deyiladi kompaniya matbuot xizmati xabarida.

Qayd etilishicha, samolyot qo‘ngach, ayol shifokorlarga topshirilgan.

Shuningdek, parvoz vaqtida ikki yo‘lovchi o‘rtasida nizo kelib chiqqan, ular Samarqand aeroportida huquq-tartibot organlariga topshirilgan. Samolyot bortida 364 nafar yo‘lovchi bo‘lgan.

Ta’kidlanishicha, yo‘lovchilardan biri styuardessadan “o‘ziga xos muomala”ni talab qilgan. U bog‘lab qo‘yilgan edi, g‘alayon tufayli homilador ayolning ahvoli yomonlashgan. “Mash” nashrining yozishicha, janjalchi o‘zini Krasnoyarsk gubernatori Aleksandr Ussning o‘g‘li, deb tanishtirgan (uning o‘g‘li Artem Uss Italiya qamoqxonasida).

Aeroflot vakilining so‘zlariga ko‘ra, samolyotni parvozni davom ettirishga tayyorlash paytida “texnik sabablar yuzaga kelgan, natijada aviakompaniya samolyotni keyingi parvozlardan olib tashlashga qaror qilgan”. Odamlarni Moskvaga yetkazish uchun kichikroq sig‘imdagi ikkita zaxira samolyoti ishlatilgan. Yo‘lovchilarning bir qismi “Aeroflot”ning navbatdagi – Samarqanddan Moskvaga muntazam parvoziga qayta bron qilindi. Ular mehmonxonada turar joy, oziq-ovqat va ichimlik bilan ta’minlangan.

• Bangkok
• Samarqand
• Samolyot
• Tailand