2026-yil 19-oktyabr kuni soat 09:00 holatiga ko‘ra, Toshkent shahrida havo sifati indeksi 153 AQI ni tashkil etdi. IQAir ma’lumotlariga ko‘ra, bu “zararli” darajaga mos keladi. Poytaxt havosidagi PM2.5 mayda zarrachalari konsentratsiyasi Jahon sog‘liqni saqlash tashkiloti tavsiya etgan yillik me’yordan 11,6 baravar yuqori ekani qayd etilgan.

Ushbu ko‘rsatkich bilan Toshkent dunyoning havosi eng ifloslangan yirik shaharlari reytingida 13-o‘rinni egalladi. Samarqand shahrida ham havo sifati yomonlashib, AQI ko‘rsatkichi 105 ga yetdi. Bu darajadagi havo, ayniqsa, bolalar, keksalar va nafas olish tizimi kasalliklari bor insonlar uchun xavf tug‘dirishi mumkin.

Havo ifloslanishi kuchaygan sharoitda ochiq havoda jismoniy mashqlarni cheklash, derazalarni yopiq tutish va tashqariga chiqqanda himoya niqobidan foydalanish tavsiya etiladi. Xonadagi havo sifatini yaxshilash uchun havo tozalagichlardan foydalanish ham mumkin.

Ma’lumot uchun, O‘zbekistondagi xalqaro aeroportlar yaqinida atmosfera havosi sifatini avtomatik monitoring qilish tizimlari o‘rnatilmoqda. Dastlabki stansiyalar 9-oktyabr kuni Samarqand, 15-oktyabr kuni esa Farg‘ona aeroportida ishga tushirilgan. Kelgusida bunday uskunalarni mamlakatdagi barcha xalqaro aeroportlar yaqinida o‘rnatish rejalashtirilgan.