22°
Kechasi 12°
O‘zPFL rahbari OChL hamda OFK kubogi kvotalari haqida gapirdi.
“Chempionlar ligasiga 1 ta va OFK kubogiga 1 ta yo‘llanma. Ha, bu biz uchun kam. Kvotalar sonini yildan-yilga oshirib borish esa o‘zimizning qo‘limizda. Tushuntirishga harakat qilaman.
OFK kvotalar belgilashda so‘nggi 4 yillik natijalarga e’tibor qaratib kelayotgan edi. Buning natijasida biz 2023/24 yilgi mavsum uchun 2+2 kvotasiga ega chiqdik. Hozirgi holatda g‘arb mintaqasida Saudiya, Eron va Qatardan ortdamiz.
2024/25-yilgi mavsumdan e’tiboran OFK kvota ajratishda so‘nggi 8 yillik natijalarga e’tiborini qaratadi. Oqibatda BAA ham bizdan o‘zib ketadi. Chunki tahminan 2014-17-yillar davomida futbol klublarimiz xalqaro maydonda juda sust ishtirok etgan. Hisoblash esa 2015-yilni ham nazarda tutadi. Pandemiya sabab 2020-yil hisobga kiritilmaydi.
Fevral oyida "Nasaf", avgustdan boshlab "Navbahor" va AGMK, sentyabrdan boshlab "Paxtakor" va "Nasaf" Chempionlar ligasida muvaffaqiyatli ishtirok etishiga tilakdoshmiz. Bu esa kvotalarimiz sonini oshirishga yordam berishi mumkin. Hozirgi holatda esa BAA ham ancha ilgarilab ketgan.
O‘sha 2014 yillardan boshlab biz lisenziyalash jarayoniga past nazar bilan qaraganmiz, futbol klublarimizni tom ma’noda professional futbol klublariga aylantirishda ko‘zbo‘yamachilik bilan mashg‘ul bo‘lganmiz. Futbol sharhi, Sokker klub kabi dasturlar, Erudit sport gazetasidagi maqolalar bejizga yaxshi ko‘rilmagan. Chunki o‘sha vaqtlardagi holat ularda ifoda etilgan. Biz haqiqiy holatimizni aniq tan olishimiz va keyingi rejalarni shunga qarab moslashtirishimiz shart. Biroq afsuski, bugun biz sms yozgan shaxslar Abbos Fayzullayevning Chempionlar ligasida ehtimoliy Ronalduga qarshi o‘ynashidan ko‘ra, uning U20 Osiyo chempionatida to‘p surishini ko‘proq istamoqda. Bu esa bizga potensial Shomurodovlarni emas, bir necha yil yo‘qolib qolib, keyin katta qiyinchilik bilan oyoqqa turadigan Iskanderovlarni taqdim etishi haqiqatga yaqinroq. Kelajak avlod bizdan ranjimasligi uchun ham xushyorroq bo‘lishimiz shart”, – deydi Imomxo‘jayev.
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
O‘zbekiston va jahonda ro‘y berayotgan eng so‘nggi voqea-hodisalar, sport, shou-biznes, madaniyat, informatsion texnologiyalar va ilm-fan yangiliklaridan doimo xabardor bo‘ling!
