2026-yilda ramazon oyining birinchi kuni 19-fevral, payshanba kuniga, Ramazon hayiti esa 20-mart, juma kuniga to‘g‘ri kelishi kutilmoqda. Bu haqda Turkiy davlatlar tashkiloti (TDT) Musulmon diniy idoralari rahbarlari kengashining Fatvo hay’ati Samarqandda bo‘lib o‘tgan yig‘ilishida belgilangan.

Ma’lum qilinishicha, 2026-yil 2–4-fevral kunlari Samarqand shahrida Turkiy davlatlar tashkiloti mamlakatlari Musulmon diniy idoralari rahbarlari kengashi huzuridagi Fatvo hay’atining maslahat yig‘ilishi bo‘lib o‘tdi. O‘zbekiston musulmonlari idorasi rahbarligida tashkil etilgan tadbirda tashkilotga a’zo mamlakatlar diniy idoralari vakillari va islom ulamolari ishtirok etdi.

Ramazon oyining birinchi kuni va Ramazon hayiti haqida qabul qilingan ushbu qo‘shma qaror turkiy davlatlarning o‘z musulmon jamoalari birligini mustahkamlash va diniy amaliyotlarni zamonaviy ilmiy kashfiyotlar bilan uyg‘unlikda saqlashga sodiqligini yana bir bor namoyish etadi.

Ushbu Fatvo hay’atiga TDT a’zo mamlakatlar - Turkiya, Ozarbayjon, Qozog‘iston, Qirg‘iziston, O‘zbekiston va TDT kuzatuvchi davlatlari Turkmaniston va Vengriya rasmiy musulmon diniy idoralari vakillari kiradi.

• Hayit
• Ramazon