Liviya sobiq rahbari Muammar Qazzofiyning o‘g‘li Saif al-Islom Qazzofiy o‘ldirildi. Bu haqda marhumning oilasi, advokati va manbalarga tayanib Reuters xabar berdi.

53 yoshli Saif al-Islomning o‘limi tafsilotlari noma’lum. Liviya bosh prokurorining idorasi va sud-tibbiyot shifokorlari jasadni tekshirib, uning o‘q jarohatlaridan vafot etganini aniqlagan. Hozirda idora gumonlanuvchilarni aniqlash va jinoiy ish qo‘zg‘atish uchun zarur choralarni ko‘rish ustida ishlamoqda.

Al Hadath telekanalining ma’lum qilishicha, qotillik Az-Zaviya shahri yaqinidagi uyining bog‘ida sodir bo‘lgan. To‘rt nafar hujumchi Saif al-Islomni og‘ir yaralab, voqea joyidan yashiringan.

Qurollangan odamlar uning uyiga bostirib kirishdan oldin kuzatuv kameralarini o‘chirib qo‘ygan. Tungi 02:30 atrofida boshlangan otishma oqibatida Saif jon bergan.

Al Hadath xabariga ko‘ra, ayrim mahalliy OAVlar Qazzofiyning o‘g‘li Liviya Milliy birlik hukumatiga qarashli 444-jangovar brigada kuchlari bilan to‘qnashuvda halok bo‘lganini yozmoqda. Biroq brigadaning o‘zi bunga aloqadorligini rasman rad etib, Az-Zaviya hududida ularning bo‘linmalari bo‘lmaganini bildirgan.

Saif al-Islom Qazzofiy — Muammar Qazzofiyning ikkinchi o‘g‘li, u rasmiy davlat lavozimlarida ishlamagan bo‘lsa-da, uzoq vaqt davomida otasidan keyin mamlakatdagi eng nufuzli shaxslardan biri hisoblangan. U “Xalqaro Qazzofiy xayriya jamg‘armasi”ni tashkil etish tashabbuskori hisoblanadi. Saif al-Islom Qazzofiy garovga olinganlarni ozod qilish bo‘yicha muzokaralarda va diplomatik missiyalarda ishtirok etgan.

2011-yilda Muammar Qazzofiy hokimiyatdan ag‘darilib, o‘ldirilgach, Saif hibsga olinib, 2017-yilgacha qamoqda saqlangan. 2011-yilda Xalqaro jinoiy sud uni insoniyatga qarshi ikkita jinoyat moddasi bo‘yicha qidiruvga bergan, ammo Liviya uni topshirmagan. Keyinchalik Saif siyosatga qaytib, 2018 va 2021-yillardagi prezidentlik saylovlarida ishtirok etishni rejalashtirgan, ammo bu saylovlar o‘tkazilmagan. 2021-yilda Liviya prokuraturasi uni Rossiyaning “Vagner” xususiy harbiy kompaniyasi jangarilari bilan aloqada gumonlanib hibsga olishga order bergan.

• Liviya
• Otishma