2025-yil 17-aprel kuni Farg‘ona viloyati Furqat tumanida maktab direktori Gulira’no Qosimova IIB xodimlari tomonidan yechintirilib, kaltaklandi. Bu haqda ayol Kun.uz’ga bergan intervyusida ma’lum qilgan. Ushbu material yuzasidan Senat hamda Farg‘ona viloyati IIB munosabat bildirib, holat nazoratga olinganini xabar berdi.

Manbaga ko‘ra, tuman ichki ishlar va soliq boshliqlari o‘rtasidagi adovat bo‘lgan. Soliqchidan o‘ch olish payida yurgan IIB xodimi ayol uning uyiga borgan paytdan foydalangan. Ya’ni, Gulira’no Qosimova erining operatsiyasi uchun qarz so‘rab, tanishi, tuman soliq inspeksiyasi boshlig‘i oldiga boradi. Keyin ichki ishlar xodimlari uyga birdaniga bostirib kiradi. Soliq boshlig‘i va maktab direktorini yechintirib, kaltaklashga tushishadi. Intervyuda aytilishicha, IIB xodimlari ayolning yalang‘och holatini telefon kamerasiga tasvirga olib, undan erkak jinsiy aloqa qilishga majburlagani haqida ariza yozib berishni talab qiladi.

Ayol tuhmatni inkor etib, ariza yozmaydi. Keyin unga turli bosimlar o‘tkaziladi, hatto turmush o‘rtog‘iga “xotiningni boshqasi bilan ushlab oldik”, deb aytishgacha borishadi. Manba ichki ishlar rahbari soliq boshlig‘ini ishdan ketkazish maqsadida mazkur “qo‘lga olish” tadbirini uyushtirganini qayd etgan.

Intervyuda ayol voqea sabab ruhiy tushkunlikka tushib, o‘z joniga qasd qilishga uringani, ammo omon qolib, voqeani jamoatchilikka oshkor etganini aytgan. Natijada IIB boshlig‘i egallab turgan lavozimidan ozod etilgan. Unga nisbatan jinoyat ishi qo‘zg‘atilib, tergov harakatlari olib borilgan. Ammo uning sherigi hisoblanayotgan o‘rinbosari, ayolni tahqirlagan tezkor xodimlar hali ham o‘z lavozimlarida ishlayotgani aytilmoqda. Gulira’no Qosimovaning ta’kidlashicha, sobiq IIB boshlig‘i o‘rinbosari bo‘lgan ishlarni bosdi-bosdi qilish uchun ayolga tanishlari orqali 50 ming dollargacha pul taklif qilgan.

Gulira’no uni tahqirlab, do‘pposlagan, “operatsiya”da qatnashgan barcha xodimlarga qonun doirasida qat’iy chora ko‘rilishini istashini bildirgan. Holat bo‘yicha prokuratura tomonidan tergov harakatlari o‘tkazilib, sobiq IIB boshlig‘i va mas’ul shaxslar bo‘yicha ayblov ishi mazmunan ko‘rish uchun sudga yuborilgan.

Oliy sud matbuot xizmati sobiq Furqat tuman IIB boshlig‘i va uning birinchi o‘rinbosariga oid jinoyat ishi Quva tuman sudida ko‘rib chiqilayotganini ma’lum qildi.

Senat holat bo‘yicha Ichki ishlar vazirligi hamda boshqa huquqni muhofaza qilish organlar tomonidan qonuniy qaror qabul qilishi parlament nazoratiga olinganini bildirdi. Shuningdek, Farg‘ona viloyati IIB ham yuqoridagi holat nazoratga olinganini ma’lum qildi.

“Furqat tumani IIB boshlig‘i soliq boshlig‘iga nisbatan fitna uyushtirgani, begona ayol sha’nini bulg‘agani haqidagi so‘nggi xabar va unda keltirilgan holat yuzasidan prokuratura organlari tomonidan jinoyat ishi qo‘zg‘atilib, tergov harakatlari olib borilyapti. Biroq yuqoridagi holat bo‘yicha hali tergov va sud jarayonlari yakunlanmasdan turib, to‘liq asoslanmagan ma’lumotlarni ommaga taqdim etish ortidan fuqarolar orasida shov-shuv uyg‘ondi. Shu munosabat bilan fuqarolarimizdan keltirilgan vajlar hali tasdiqlanmasdan, sud hukmi e’lon qilinmasdan turib, noo‘rin xulosa chiqarmaslikni so‘raymiz”, – deyiladi viloyat IIB rasmiy munosabatida.

Ma’lum qilinishicha, yakuniy natija yuzasidan xolis munosabat bildiriladi.

• Farg‘ona
• IIB
• Munosabat