Toshkent shahrining Glinka ko‘chasida yuz bergan avariyaga yerosti gaz quvuridan sizib chiqqan gaz sabab bo‘lgani aniqlandi. Bu haqda Toshkent shahar hokimligi matbuot xizmati ma’lum qildi.

Dastlab “Hududgaz Poytaxt” hodisa tabiiy gaz tarmoqlari bilan bog‘liq emasligini bildirgan edi. Biroq keyingi tekshiruvlar davomida diametri 219 mm bo‘lgan yerosti gaz quvurining taxminan 375 kv sm maydonidagi bir nechta joydan gaz sizib chiqayotgani aniqlangan.

Hokimlik ma’lumotiga ko‘ra, sizib chiqqan gaz issiqlik tarmog‘i kamerasida to‘planib, avariya holatini yuzaga keltirgan.

Hozirda mutaxassislar hodisaning barcha tafsilotlarini o‘rganmoqda. Tekshiruv yakunlangach, yo‘l qoplamasini tiklash ishlari davom ettiriladi va yo‘l transport harakati uchun ochiladi.

Mazkur holat yuzasidan jinoyat ishi qo‘zg‘atilgan. Tergov yakunlariga ko‘ra, aybdor shaxslarning xatti-harakatlariga huquqiy baho beriladi.

Eslatib o‘tamiz, 3 sentyabr kuni Yakkasaroy tumanining Glinka ko‘chasida yo‘l qoplamasining bir qismi o‘pirilib ketgan, hodisa oqibatida bir kishi jarohatlangan edi.