5 yil davomida AQSh terma jamoasi tarkibida dona surgan o‘zbekistonlik grossmeyster Gulruhbegim Tohirjonova bundan buyon yana O‘zbekiston nomidan ishtirok etishi e’lon qilindi.

U bilan olib borilgan muzokaralar natijasida Gulruhbegim yurtimizga qaytib kelgan.

“Gap pulda yoki va’dalarda emas, men doim vatanimiz bayrog‘i ostida qatnashishni xohlaganman. Lekin orada shunday davr bo‘ldiki, ketishga majbur bo‘ldim. Agar men O‘zbekistonda muhit o‘zgarganini, shaxmat federatsiyasida sportchilarga e’tibor paydo bo‘lganini his qilmaganimda qaytmas edim”, – deya bu qarorini izohlagan Gulruhbegim.

Ma’lumot uchun, Tohirjonova shu paytgacha AQSh terma jamoasining 1-raqamli shaxmatchisi edi. U 2023-yilda AQShda “Yilning eng yaxshi ayol shaxmatchisi” deb topilgan.

U oxirgi ikkita Olimpiada davomida AQSh va O‘zbekiston terma jamoalari o‘zaro duch kelganda Gulruhbegim o‘z yurtdoshlariga qarshi dona surishdan bosh tortgan.

• AQSh
• O‘zbekiston
• Shaxmat