Buxoro viloyatining G‘ijduvon tumanida akademik ta’til olish uchun tibbiy ma’lumotnoma tayyorlab berishni va’da qilib, 500 AQSH dollari olgan oilaviy poliklinika shifokori ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Ma’lum qilinishicha, tezkor tadbir departamentning G‘ijduvon tumani bo‘limi va boshqa huquqni muhofaza qiluvchi organlar hamkorligida o‘tkazilgan. Unda shifokor U.S. poliklinikadagi yuqori lavozimli tanishlari orqali fuqaro Sh.R. uchun tibbiy ma’lumotnoma tayyorlab berishni va’da qilgani aniqlangan.

Shifokor kelishilgan 500 AQSH dollarini olayotgan vaqtida ashyoviy dalillar bilan ushlangan.

Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan. Hozirda tergov harakatlari olib borilmoqda.