Janubiy Koreya sobiq prezidenti Yun Sok Yol Shimoliy Koreyaga dronlar yuborgani uchun unga “dushmanga yordam berganlik” ayblovi qo‘yildi. Bu haqda Yonhap xabar berdi.

Sobiq prezident hokimiyat vakolatini suiiste’mol qilganlikda ham ayblanmoqda. Maxsus tergov guruhi ma’lumotlariga ko‘ra, Yun 2024-yil oktyabr oyida Pxenyanning javob harakatlarini qo‘zg‘atish va o‘sha yilning dekabr oyida harbiy holat joriy etish uchun bahona sifatida Shimoliy Koreyaga dronlarni yuborishni buyurgan.

Tergovchilar fikricha, Yunning harakatlari harbiy sirlarning oshkor bo‘lishiga olib kelgan. Chunki dronlar Pxenyan yaqinida qulab tushgan. Natijada Yun Sok Yolga “dushmanga foyda keltirish” va mansab vakolatini suiiste’mol qilish ayblovi qo‘yilgan.

Bundan tashqari, prokuratura sobiq mudofaa vaziri Kim Yon Xyon va Mudofaa vazirligining sobiq kontrrazvedka rahbari Yo In Xyonga ham xuddi shu moddalar bo‘yicha ayblov e’lon qildi.

Uchuvchisiz operatsiyalar qo‘mondonligi rahbari Kim Yon De xizmat vazifalarini bajarishga to‘sqinlik qilish va soxta hujjatlar tuzishga undashda ayblanmoqda, biroq u ozodlikda qolmoqda.

Yun Sok Yol 10-iyuldan buyon hibsda saqlanmoqda. Sobiq prezident 2024-yili mamlakatda siyosiy notinchlik keltirib chiqarganlikda, jumladan, harbiy holat e’lon qilgani ortidan isyonda ayblangandi. U aprel oyida impichmentga uchragan.

Seul markaziy okrugi sudyasi 9-iyul kuni Yun “dalillarni yo‘q qilishi mumkinligidan qo‘rqib”, uni hibsga olishga order bergan. U dastlab yanvar oyida hibsga olingandi. Tergovchilar uni Seul markazidagi qarorgohidan hibsga olish uchun barrikadalarni kengaytirib, tikanli simlarni kesib tashlagan. Yun ikki oy o‘tgach, uning hibsga olinishini texnik sabablarga ko‘ra bekor qilganidan keyin ozodlikka chiqqandi.

• Janubiy Koreya
• KXDR
• Prezident