Prezident Shavkat Mirziyoyev 12-yanvar kuni Xavfsizlik kengashining Qurolli kuchlar va harbiy-ma’muriy sektorlarning 2023-yildagi faoliyati yakunlari va yaqin istiqbolga mo‘ljallangan vazifalar muhokamasiga bag‘ishlangan kengaytirilgan yig‘ilishda axborot xavfsizligi masalalariga to‘xtalib o‘tdi.

Jumladan, davlat rahbari O‘zbekistonda milliy kontent yaratishning dolzarbligini ta’kidladi.

“Biz O‘zbekiston axborot makonida milliy kontent yaratishni o‘z qo‘limizga olmas ekanmiz, dunyodagi voqealarga milliy manfaatlarimiz nuqtayi nazaridan baho bermas ekanmiz, bu ishlarni xorijdan turib amalga oshirilishiga imkon yaratib beramiz. Chunki odamlardagi yangilik, tahliliy ma’lumotlar, real voqealarga ehtiyojni biz to‘ldirmas ekanmiz, buni boshqalar qiladi. Bunga mutlaqo yo‘l qo‘yib bo‘lmaydi”, dedi Shavkat Mirziyoyev.

Shuningdek, prezident ommaviy axborot vositalaridagi tanqidlarga ham munosabat bildirdi.

“Har qanday tanqidga javob berishga (tayyor bo‘lishimiz), jurnalist haq bo‘lsa, buni tan olishimiz kerak. Nohaq bo‘lsa, unga tushuntirish orqali yolg‘on xabarlarni oldini olishga o‘rganishimiz va buni nopok va yolg‘onligini butun jamiyatimizga shuni tushuntirishimiz kerak”, dedi davlat rahbari.

• Jurnalistika
• Prezident