Toshkentda BMW avtomobilida YPX inspektorini urib yuborib, uning o‘limiga sabab bo‘lgan voyaga yetmagan D.T.ga 2 yil 4 oy muddatga ozodlikdan mahrum qilish jazosi tayinlangandi. Hukm jamoatchilik orasida turli muhokamalarga sabab bo‘lgach, Toshkent shahar sudlari holat yuzasidan izoh berdi.

Sudlar matbuot xizmatining ma’lum qilishicha, voyaga yetmaganlar tomonidan sodir etilgan jinoyatlar bo‘yicha ishlarni ko‘rib chiqish va ularga jazo tayinlash qonunchilikda alohida tartibga solingan.

Jumladan, voyaga yetmaganlarga oid jinoyat ishlari yopiq sud majlislarida ko‘riladi. Ularga ozodlikdan mahrum qilish jazosi Jinoyat kodeksining 85-moddasida belgilangan tartibda tayinlanadi. Bunday jazo umumiy tartibdagi koloniyalarda emas, balki tarbiya koloniyalarida o‘taladi.

Sudlar izohida qayd etilishicha, mazkur normalar voyaga yetmaganlarning ruhiy, fiziologik va ijtimoiy jihatdan hali to‘liq shakllanmaganligi bilan bog‘liq. Bunda jazodan asosiy maqsad shaxsni jazolash emas, balki uni qayta tarbiyalash va jamiyatga moslashtirish hisoblanadi.

Sudning ta’kidlashicha, D.T. jinoyat sodir etgan paytda 16 yoshga to‘lmagan va maktab o‘quvchisi bo‘lgan. Unga jazo tayinlashda uning yoshi, axloqan tuzalishi, qayta tarbiyalanishi hamda kelgusida yangi jinoyatlar sodir etishining oldini olish kabi holatlar hisobga olingan.

“Marhumlarni hayotga qaytarib bo‘lmaydi. Shu nuqtayi nazardan, jamoatchilikning ehtirosli munosabatlariga tushunish bilan qaraladi. Biroq sud tomonidan bosiqlik va jinoyat ishi bo‘yicha har bir holat chuqur tahlil qilingan holda to‘xtamga kelinishi lozim”, — deyiladi rasmiy izohda.

Shuningdek, sudlar hukm hali qonuniy kuchga kirmaganini ma’lum qildi. Taraflar hukm ustidan shikoyat berish huquqiga ega. Shikoyat kelib tushgan taqdirda, ish yuqori sud instansiyasida belgilangan tartibda ko‘rib chiqilib, unga huquqiy baho beriladi.