Kuzning nisbatan iliq va sovuq kunlarida kiyishga mos keladigan, obrazingizning yodda qolarli boʻlishiga yordam beradigan zamonaviy oyoq kiyimlar toʻplamini jamladik.

Lofer, brog, oksford

Ayollar garderobidan oʻrin olgan erkaklar poyabzali ancha vaqtdan beri yangilik boʻlmay qolgan. Dizaynerlar poyabzallarning yangi toʻplamlarini yaratishda bu jihatni eʼtiborsiz qoldirganlari yoʻq. Kuz va qish faslida erkaklar uslubiga xos klassik, shu bilan birga uslub jihatidan qoʻpolroq koʻrinadigan tuflilar avvalgidek urfda boʻlib qoladi. Ayollarga xos nafis poyabzallarni afzal koʻradiganlar esa baland poshnali loferlarni tanlashlari mumkin.

Qoʻpol tagcharm qismiga ega poyabzallar

Doʻkonlarda qoʻpol koʻrinishda ishlangan oyoq kiyimlarni topish muammo emas. Bu mavsumda ularning platformasi qalin turlariga eʼtibor qaratishingizni maslahat beramiz. Ular yorqin va jozibali koʻrinadi. Bu klassik uslubdagi lofer yoki ip bilan bogʻlanadigan botinka ham boʻlishi mumkin – tanlov qilish imkoniyati sizniki.

Rezina etiklar

Rezina etiklar oʻz dolzarbligi va ahamiyatini yoʻqotmay kelmoqda. Ular oʻta zamonaviy va chiroyli koʻrinishdan tashqari kiyib yurish uchun ham qulayligi bilan ajralib turadi. Bunday poyabzalni boshqa buyumlar bilan uygʻunlashtirishda hech qanday cheklovlar yoʻq: uni keng bichimdagi shimlar, kalta yubka yoki nafis koʻylaklar bilan ham kiysangiz boʻladi.

Jokeylar etigi

Dizaynerlar bu mavsumda ham jokeylar uslubidan ilhomlanishda davom etishgan. Jokeylar etigi klassika uslubidagi va ixcham poyabzallarni xush koʻradigan ayollarga mos keladi. Uni juda koʻp turdagi liboslar bilan birga kiysa boʻladi.

Kloglar

Koʻrinishi xunuk poyabzallar trendi ham bir necha yillardan beri urfdan chiqmay keladi. Qulaylik jihatidan ularga teng keladigan poyabzal rostan ham yoʻq, bunday oyoq kiyimlarini istalgan libos: yubkalar, jogger va koʻylaklar bilan uygʻunlashtirsa boʻladi. Bundan tashqari, kloglar ishbilarmonlar obraziga ham mos keladi.

• moda
• qiziqarli